Replegan sinyaturas pa l’UE con l’obchectivo de “amillorar a protección d’as minorías nacionals y lingüisticas”

I hai quasi 150.000 sinyaturas d'o millón requeriu. A iniciativa ha estau creyada per FUEN.

0
56
visitas
O logotipo d'a campanya Minority Safepack
O logotipo d'a campanya Minority Safepack

O proximo 3 d’abril ye o zaguer diya pa sinyar ista iniciativa con o nombre de “Minority SafePack” que pide a l’UE “que adopte un conchunto d’actos churidicos con l’obchectivo d’amillorar a protección d’as personas perteneixients a minorías nacionals y lingüisticas y reforzar a diversidat cultural y lingüistica de l’Unión”.

Amás, a iniciativa tamién prenende que “s’incluyan midas politicas en l’ámbito d’as luengas rechionals y minoritarias, l’amostranza y a cultura, a politica rechional, a participación, a igualdat, os contenius audiovisuals y atros contenius mediaticos, asinas como o refirme rechional.”

 

Midas concretas

A iniciativa tiene midas concretas pa demandar-le a l’UE, como per eixemplo:

  • Recomendacions de l’UE pa la protección y promoción d’a diversidat cultural y lingüistica
  • Programas de financiamiento pa comunidatz lingüisticas chicotas
  • A creyación d’o Centro de Diversidat d’as Luengas
  • Incluyir en os obchectivos de financiamiento rechional de l’UE a protección d’as minorías nacionals y a promoción d’a diversidat cultural y lingüistica
  • Investigar sobre l’importancia d’as minorías socials pa la nuestra sociedat y pa Europa
  • Una sola lei de copyright europea, pa que os programas de televisión puedan veyer-se en a luenga materna
  • Libertat d’emisión y de recepción de emisions audiovisuals en rechions minoritarias
  • Bloqueyar a inacción d’os estaus en o refirme d’a cultura minoritaria, os meyos, y a conservación d’o patriminio cultural.

 

CHA refirma l’iniciativa

En una rueda de prensa o pasau 11 de chinero, CHA anunció o suyo refirme a l’iniciativa clamada “Minority SafePack Initiative”.

“beneficiaría dreitament a Aragón”

“Organizau per a Unión Federal de Nacionalidatz Europeas (FUEN), ye una iniciativa que, si finalment s’apreba, beneficiaría dreitament a Aragón y contribuyiría, sin garra dubda, a fer Europa un lugar cultural y respectuoso con os dreitos d’as minorías”, deciba Martínez Tomey, responsable d’afers europeus en CHA.

 

As sinyaturas, per Internet pero tamién en papel

Ista iniciativa se puet sinyar dreitament dende a web oficial de l’UE u replegar firmas en papel y ninviar-las por correu electronico. Os requisitos son os mesmos que pa votar en as esleccions europeas, tener 18 anyos u mas y ser ciudadano de l’UE. Pa que ista iniciativa plegue ent’a as institucions europeas cal tener a lo menos 1 millón de sinyaturas. Actualment cuenta con 150.000 y o zaguer diya pa sinyar ye o 3 d’abril.

A organización d’ista iniciativa ha feito tamién camisetas, posters, flyers y atros materials pa publicitar-lo.

 

102.000 refirmes dende Rumanía, 11.000 dende l’Estau Espanyol

Rumanía fa récord al replegar 102.000 sinyaturas, o que suposa un 425% d’o suyo umbral (24.000), encara que l’Estau Espanyol nomás ha aconseguiu 11.000 sinyaturas, o que suposa un 28% d’o suyo umbral (40.500).

Os dos solos países qu’han aconseguiu os refirmes suficients son Rumanía y Austria.

 

FUEN, dende 1949 representando os intréses d’as minorías europeas

Tal como se presentan en a suyo puesto web, FUEN que estió fundau en 1949 (o mesmo anyo que o Consello d’Europa) “representa os intréses d’as minorías europeas en un libel rechional, nacional y, en particular, en europeu.”. Os obchectivos de FUEN son “protecher y promocionar a identidat, as luengas, a cultura, dreitos y o propio caracter d’as minorías europeas”.

Fuen tiene dreito a participar en o Consello d’Europa y tiene estatus consultivo en Nacions Unidas.

Si i has trobau errors d’escritura u gramaticals, por favor notifica-nos-lo seleccionando o texto y pretando Ctrl+Enter.